سيدنا بلال 
إرحل:
كلمه في اللغه العربيه، معناها...معناها إرحل (الحقيقه المفروض تبقى واضحه)...وهو أن تذهب إلى مكان بعيد عن من يسألك الرحيل...
نحطها في جمله عشان نسهل الأمور.
إرحل يعني إمشي..يمكن مابيفهمشي.
(شكر خاص للزملاء في ميدان التحرير على محاولاتهم المستميته من أجل توضيح هذه المعلومه)
طرق الرحيل:
يفضل البعض أن يرحل سيراً على الأقدام، أو عدواً ، أو بواسطة دراجه يطلق عليها العامه لفظ (بسكلته)...ولكن لا ينصح بهذه الطرق لمن هم فوق الثمانين
.
البدائل هي:
السياره: بس اللجان الشعبيه شاده حيلها اليومين دول، فلو نزلت، إبقى خد معاك بطاقتك..وإرمي أي ممنوعات موجوده معاك.
العبّاره : بس دي على مسؤوليتك بقى...عشان الحاجات دي في "العهد" ده مش مضمونه.
الطياره : ودي بقى أسهل طريقه..خصوصاً لو كنت شغال سوّاق على طياره قبل كده.
وبالمناسبه دي أحب أضيف معلومه..مطار القاهره الدولي موجود في مصر الجديده...حضرتك هتطلع على صلاح سالم..خلّي البارون على يمينك وخد في وشك طوّالي...هايقابلك كوبري شيراتون..تنزل منه وتكمل على طول زي مانت...
طيّارة جده بتطلع من صاله 3 في المطار الجديد..
نتمنى لكم رحله سعيده.
بابا مبارك:
الأب هو الذكر الذي يلقح حيوانه المنوي البويضه في رحم الأنثى (الأم) ..الكلام ده مؤكد علمياً بالدليل القاطع، وأنا مش بتكلم من فراغ...أنا عندي الملفات والمستندات التي تثبت صحه كلامي (تلميذك يا أستاذ مرتضى)..وكمان عندي سي ديهات وأفلام فيديو علميه، بتوضح بالصوت والصوره، كيفيه إتمام عمليه التلقيح دي
.
أنا بقول الكلام ده عشان جايز فيه ناس كانت غايبه يوم حصة الأحياء دي في تالته إعدادي.
وبناءً على ذلك..أي حد يقول بابا مبارك، فهوّ يطعن طعناً مباشراً في شرف السيده والدته.
الشرطه:
الشرطه هو جهاز موجود في جميع دول العالم...وعادة يرتدي أفراده زيّ موَّحد...ومهمتهم هي حماية المواطنين..وإلقاء البلطجيه والمجرمين في السجون
.
فأنا بوجه كلامي لرجال الشرطه المخلصين.
أي بلطجي يقولك إفتحلي باب السجن وأنا مش هامشي..متصدقوش...دول معظمهم ناس وحشين وكذّابين...ولو قالك إديني السلاح عشان أتفرج عليه، ومش هاضرب...إوعى تصدقه...إبقى قول له إن المسدس ده بتاع واحد صاحبك وهو محلّفك ماتديهوش لحد.
الإنتخابات:
هي عمليه غير معقده..تذهب خلالها الشعوب الى صناديق الإنتخاب، لتختار من تريد، في الموقع الذي تريد.
ومن المتعارف عليه..إن أكثر واحد حصل على أصوات..يفوز.. مافيهاش 4% تفوّق رياضي، أو أحسن تواني زي تصفيات كأس الأمم الأفريقيه كده.
وأيضاً جرى العُرف أن الموتى عادة يصعُب عليهم الذهاب للإدلاء بأصواتهم في العمليه الإنتخابيه...تقدر تقول لظروفهم الصحيه.
الأرقام والعَّد :
واضح إن فيه مشكله كبيره في موضوع العد ده عند جميع العاملين في التلفزيون المصري..عشان كده أنا هاحاول أبسط الأمور قدر إستطاعتي...أنا عاذرهم برضه..لأن أكيد معظمهم كان أدبي.
لمّا تكون بتعد ععد المتظاهرين في ميدان التحرير، أو في أي محافظه...حضرتك تعد فيه كام راس..لأن البني آدم عادة ليه راس واحده.
لو طلع عدد تلك الرؤوس من 1 الى 10 : دول إسمهم بضع متظاهرين.
من 10 الي 100 : دول إسمهم عشرات المتظاهرين.
من 100 إلى 1000 : دول إسمهم مئات المتظاهرين.
أكثر من 1000: إسمهم آلاف المتظاهرين.
أكثر من 99999 : العدد ده له إسم علمي..وهو..مليون.
وفيه بقى عدد أكبر من المليون..إسمه المليار...بس أنا ماقدرش أتكلم عنه...وهل يُفتى ومالك في المدينه؟...حضرتك تستضيف اي واحد من أعضاء الحزب الوطني..وهو هايكون أكثر درايه بكثير منّا في مثل هذا الرقم.
كنتاكي:
كنتاكي هي سلسله مطاعم أمريكيه، نشأت في ولايه أمريكيه تحمل نفس الإسم...وغير صحيح إنها تبيع الفول أو الطعميه...وأيضاً غير صحيح أن الرجل صاحب الصوره الموضوعه على الأكياس والعلب الخاصه بالمطعم، ينتمي إلى جماعه الإخوان المسلمين.
تقدم وجبات المطعم في علب تحمل اللونين الأبيض والأحمر..ومن أشهر وجباته هي، الدينر بوكس، والدينر بوكس سبايسي، والدينر بوكس الحار (لأن في مصر..دي حاجه، ودي حاجه تانيه خالص)...وطبقاً لشهادة الأخ الكريم ليونل ميسي..أن دجاج كنتاكي..سره "لاسيس".
الشعب يريد إسقاط النظام:
أنا عارف إن الشعب ماكانش واضح في الحته دي..وأنا بعتذر نيابةً عن الشعب..لأنه لم يحدد أي نظام الذي يريد إسقاطه..
الشعب يريد إسقاط النظام؟؟
أنهي نظام؟
نظام الدوري الممتاز؟...نظام مترو الأنفاق؟...هل الشعب يرمي إلى إقاله الكابتن حسن شحاته في حالة عدم وصوله إلى كأس الأمم وكأس العالم؟
التجربه التونسيه حذرتنا من الموضوع ده...لأن السيد بن علي..إحتار امام نفس هذا الهتاف...وقعد بقى يجرب..
يشيل وزير الداخليه..بعدين يطلع يبص من البلكونه...يلاقي الشعب لسه بيهتف...الله!!...يقوم شايل وزيرتاني..ويجرى ع البلكونه...الشعب لسه برضه بيهتف...شال الوزاره كلها...لقى الشعب مابطلش لسه..
فين وفين بقى على ما فهم.
وعشان كده انا مره تانيه بوجه شكري لإخواننا في التحرير على تعديل الهتاف الى...الشعب يريد محاكمه الرئيس.
من بكره إنشاء الله الريس عمر حرب هيتقدم للمحاكمه.
ماهو أصل التناحه ليها ناسها.
مصطفى حلمي
فبراير 2011
ليست هناك تعليقات:
إرسال تعليق